„სტრატეგია აღმაშენებლის“ დეპუტატის პაატა მანჯგალაძის განცხადებით, პარტიაში შესაძლოა ბოიკოტის საკითხი გადაიხედოს.

როგორც მან ჟურნალისტებთან განმარტა, ე.წ. აგენტების კანონზე პარლამენტში გაწეულმა წინააღმდეგობამ უფრო გამოიღო შედეგი, ვიდრე ბოიკოტმა, რადგან ადამიანებამდე სწორედ პარლამენტიდან შეძლეს სათქმელის მიტანა.

„რუსულ კანონპროექტზე ავხსენით კარგად სათქმელი, გავმართეთ დებატები კომიტეტზე, შემდეგ პლენარულ სხდომაზე, რამაც უფრო შედეგი გამოიღო, ვიდრე ბოიკოტმა. ამიტომ, შეიძლება, დავაყენო საკითხი, ხომ არ გადავხედოთ ბოიკოტის საკითხს. 12 რეკომენდაციის შესრულების თვალსაზრისით, ბოიკოტის გაგრძელება არასწორი იქნება, პირიქით, უნდა ჩავერთოთ. როგორც რუსულ კანონზე მივიტანეთ სათქმელი, ასე უნდა მოხდეს რეკომენდაციებზეც. საბოტაჟი მხოლოდ რუსული კანონით კი არ ხდებოდა, საბოტაჟია, როცა არ აკეთებ სასამართლო რეფორმას, დეოლიგარქიზაცია არ ხდება, ან ცუდი ფორმით ხდება, როცა ანტიკორუფციული უწყება დაუქვემდებარეს ღარიბაშვილს, როცა ევროკავშირი გინდა, არ უნდა თქვა, რომ ევროკავშირი საბჭოთა კავშირია.

კობახიძე ჩამოყალიბდა პროპაგანდისტად და გაკვირვებული ვარ, ამ ახალგაზრდა ადამიანმა როგორ შეითვისა ასე კარგად საბჭოთა პროპაგანდის ხერხები, გაუქმებულ კანონს იყენებს ყოველდღე პროპაგანდაში, ამბობს, რომ აგენტების მიწოდებულ მოსაზრებებს ეყრდნობა [სახელმწიფო დეპარტამენტის] ანგარიში, ჩანს, რომ მიზანი გამჭვირვალობა კი არა ადამიანების სტიგმატიზება ყოფილა. ღარიბაშვილიც დაკავებულია მოსახლეობის დაშინებით, რაც რუსული ჰიბრიდული პროპაგანდის სტრატეგიაა. გამოდის და ამბობს, მესამე მსოფლიო ომის საფრთხის წინაშე ვართო, დასავლეთის, აშშ-ის და ევროკავშირის განცხადებები არ აინტერესებს და კარგად უსმენს პუტინს, რომ არ გააღიზიანოს. ვხუმრობდი - კობახიძე იტყვის, რომ ჩალის ფასი აქვს ჰააგის გადაწყვეტილებას, რომ ეს არ ნიშნავს საბოლოო ვერდიქტს, გამოვიდა მართლაც და ჩალის ფასი არ უთქვამს, დანარჩენი ყველაფერი თქვა, ჩვეულებრივი რუსი პროპაგანდისტები არიან”, - განაცხადა მანჯგალაძემ.