არ ვიცი კონკრეტული კონფიგურაციები, მაგრამ მე მაგალითად, არ გამიკვირდება, თუკი ახალი პოლიტიკური გუნდები გამოჩნდება, - ამის შესახებ „ევროპული საქართველოს“ ერთ-ერთმა ლიდერმა, გიგი წერეთელმა „პალიტრანიუსის“ გადაცემა „360 გრადუსში“ განაცხადა.

გიგი წერეთლის თქმით, კონკრეტული ინფორმაცია არ აქვს, თუმცა შესაძლებელია „მელიაც ვნახოთ რაღაც კონფიგურაციაში“.

ამასთან, წერეთლის თქმით, მნიშვნელოვანია ოპოზიციაც ჩამოყალიბდეს, რა „გზით უნდა ვიაროთ“ - გაერკვეს, რაშიც სჭირდება ერთიანობა და კოორდინაცია, რათა შესაბამისი ნაბიჯები გადადგას.

„მელიას უფლება აქვს ისევე, როგორც სხვათა შორის, ნიკა გილაურს აქვს უფლება, თუ სურვილი აქვს, რომ პოლიტიკაში იყოს, რაღაც შექმნას და გააკეთოს. თუმცა არ მაქვსო, კაცი ამბობს და ძალით თუ შევაქმნევინებთ პარტიას, არ ვიცი. მე არ ვიცი კონკრეტულად რაიმე მელიასთან დაკავშირებით. მელია იყო ძალიან აქტიური პოლიტიკური სახე, ახლა რაღაც პერიოდი აქვს, ალბათ, რთული, მაგრამ შესაძლებელია მელიაც ვნახოთ რაღაც კონფიგურაციაში, ცალკე თუ ვინმესთან ერთად.

რამდენადაც არ უნდა გვინდოდეს პოლიტიკური სპექტრის სრული გაახლება, ჩემი პროგნოზით, დაახლოებით კიდევ ათი წელი მაინც, სანამ სრულად შეიცვლება, თუნდაც ფიზიოლოგიურად პოლიტიკური ელიტა, ეს ხალხი იქნება, ოღონდ შემოვა ახალი სახეებიც, ვიღაც იქნება ძველი, ეს არის ბუნებრივი პროცესი და ჩვენ ვერ შევქმნით რაღაცას ისეთს, რაც მსოფლიოში არ ყოფილა. მთავარი ამბავი არის ის, რა იქნება ამ ქვეყანაში, რა გვექნება თუნდაც რამდენიმე თვეში და ძალიან დიდი მნიშვნელობა აქვს ოპოზიციისთვისაც, რომ საბოლოოდ ჩამოყალიბდეს, რა გზით უნდა იაროს, ვადამდელი არჩევნები გვინდა და დროზე ხელისუფლების მოშორება? როდესაც ვამბობთ, რომ ამ ხელისუფლებასთან არაფერი არ იქნება და ამავე დროს ვამბობთ, რომ „კიდევ წელიწად ნახევარი...“ კი ბატონო, მაგრამ მაშინ ხელისუფლებასთან უნდა ითანამშრომლო. ბევრი საკითხებია, რომელშიც ოპოზიცია უნდა გაერკვეს და რაშიც სჭირდება ერთიანობა და კოორდინაცია, ნაბიჯები უნდა გადადგას. ერთიანობაში არ ვგულისხმობ პარტიების გაერთიანებას, არამედ მიზნის გარშემო კოორდინირება ნამდვილად მგონია, რომ სწორია“, - განაცხადა გიგი წერეთელმა.