წილოსანი ახალისებს ძალადობას და სამარცხვინოა, რომ გენდერული თანასწორობის საბჭოს თავმჯდომარის პოსტს იკავებდეს, - ამის შესახებ ჟურნალისტებთან „ნაციონალური მოძრაობის“ ფრაქციის თავმჯდომარე თინა ბოკუჩავამ გენდერული თანასწორობის საბჭოს თავმჯდომარის პოსტიდან ნინო წილოსანის გადადგომის მოთხოვნის კომენტირებისას განაცხადა.

მისი ინფორმაციით, პარლამენტში ყველა ოპოზიციური ძალა მომხრეა, რომ წილოსანმა ეს პოსტი დატოვოს.

„ჩვენც გვქონდა ეს ინიციატივა, რომელსაც ჩვენი ინფორმაციით, მხარს უჭერს ყველა ოპოზიციური ძალა პარლამენტში. ეს ადამიანი პირდაპირ ახალისებს ძალადობას, მათ შორის, ძალადობას ქალი დეპუტატების წინააღმდეგ საპარლამენტო დარბაზიდან. მხარს უჭერს ისეთ პირებს, როგორიცაა შალვა რამიშვილი, არასდროს რეაგირებს ძალადობის ფაქტებზე პარლამენტს შიგნით თუ გარეთ, შესაბამისად, სამარცხვინოა, რომ იკავებდეს გენდერული თანასწორობის საბჭოს თავმჯდომარის პოსტს”, - განაცხადა ბოკუჩავამ.