გიორგი ვაშაძე - ყველასთან გვექნება საუბარი, მთავარია თვითონ დაინახონ თავი გამარჯვების პლატფორმაზე - კონსულტაციები ვისთან იქნება და რა იქნება, ამას დაახლოებით, ოქტომბერში ნახავთ
გავაერთიანოთ ძალები და შევეწინააღმდეგოთ უტანკო ანექსიის პროცესს, რომელსაც სათავეში მოუძღვის ივანიშვილ-კობახიძე-ღარიბაშვილის დაჯგუფება - კარი ყველასთვის ღიაა, - ამის შესახებ „სტრატეგია აღმაშენებლის“ ლიდერმა, გიორგი ვაშაძემ ჟურნალისტებთან საუბრისას განაცხადა.
როგორც ოპოზიციონერი პოლიტიკოსი აღნიშნავს, საქართველოში გაძლიერებულ რუსულ გავლენებს ერთიანობა უნდა დავუპირისპიროთ.
„ამ რუსების გაძლიერებას, რომელსაც მიზანმიმართულად აკეთებს რუსული ძალა „ქართული ოცნების“ სახით, ჩვენ უნდა დაუპირისპიროთ ერთიანობა. ამისთვის შევქმენით „გამარჯვების პლატფორმა“. გავაერთიანოთ ძალები და შევეწინააღმდეგოთ უტანკო ანექსიის პროცესს, რომელსაც სათავეში მოუძღვის ბიძინა ივანიშვილ-კობახიძე-ღარიბაშვილის დაჯგუფება,“ - განაცხადა ვაშაძემ.
მისივე თქმით, ამ ეტაპზე ოპოზიციონერ პოლიტიკოსებთან კონსულტაციები არ მიმდინარეობს.
„ყველასთან გვექნება საუბარი, მთავარია თვითონ დაინახონ თავი გამარჯვების პლატფორმაზე. ჩვენ ვამბობთ, რომ კარი ყველასთვის ღიაა. ჩვენ განაცხადი გავაკეთეთ, კონსულტაცია ახლა არავისთან [მიმდინარეობს]. კონსულტაციები ვისთან იქნება და რა იქნება, ამას დაახლოებით, ოქტომბერში ნახავთ,“ - განაცხადა ვაშაძემ.
