პაკისტანის სამხრეთ ნაწილში სარკინიგზო კატასტროფის შედეგად დაღუპულთა რაოდენობა 30-მდე გაიზარდა, დაშავებულთა რიცხვმა კი 100-ს მიაღწია.

BBC-ის ცნობით, Hazara Express-ის რამდენიმე ვაგონი საჰარას რკინიგზის სადგურთან ნავაბშაჰში ამობრუნდა.

დაშავებული მგზავრები ახლომდებარე საავადმყოფოებში გადაიყვანეს. სინდის პროვინციის ნავაბშაჰისა და მისი მეზობელი რაიონების მთავარ საავადმყოფოებში საგანგებო მდგომარეობა გამოცხადდა.

ვაგონებიდან ადამიანების გამოყვანის მიზნით სამაშველო სამუშაოები გრძელდება.

პაკისტანის რკინიგზის მინისტრის, საად რაფიკის განცხადებით, პირველადმა გამოკვლევებმა აჩვენა, რომ მატარებელი ნორმალური სიჩქარით მოძრაობდა და ცდილობენ დაადგინონ, რამ გამოიწვია მისი რელსებიდან გადავარდნა.

BBC-ი წერს, რომ პაკისტანის მოძველებულ სარკინიგზო სისტემაზე უბედური შემთხვევები იშვიათი მოვლენა არ არის. 2021 წელს სინდის პროვინციაში ორი მატარებელი ერთმანეთს შეეჯახა, რის შედეგად სულ მცირე 40 ადამიანი დაიღუპა და ათობით დაშავდა. ადგილობრივი მედიის ცნობით, 2013-2019 წლებში მსგავს ინციდენტებს 150 ადამიანი ემსხვერპლა.