ჩინეთმა აქტიური მონაწილეობა მიიღო ჯიდაში, უკრაინის ომთან დაკავშირებით გამართულ მოლაპარაკებებში და მომავალში მსგავსი შეხვედრების გამართვის შესახებ პოზიტიური სიგნალი გაგზავნა,- ამის შესახებ გამოცემა Spiegel-ი დიპლომატიური წრეების წარმომადგენლებზე დაყრდნობით იუწყება.

გამოცემის ცნობით, დახურული მოლაპარაკებები საბოლოო დეკლარაციის გარეშე დასრულდა. „დასკვნითი სიტყვები არ გაჟღერებულა, იყო მხოლოდ ფრთხილი დადებითი სიგნალები ჩინეთიდან“, - აღნიშნულია ინფორმაციაში.

შეგახსენებთ, 5-6 აგვისტოს საუდის არაბეთში ორდღიანი სამიტი გაიმართა, რომელზეც 42 ქვეყნის წარმომადგენლებმა უკრაინაში ომის მშვიდობიანად დასრულების გზები განიხილეს. შეხვედრა ეროვნული უსაფრთხოების მრჩეველთა დონეზე გაიმართა. მასში გერმანიის მთავრობის სახელით მონაწილეობა მიიღო კანცლერ ოლაფ შოლცის მრჩეველმა საგარეო პოლიტიკის საკითხებში იენს პლოტნერმა. აშშ-ის დელეგაციას კი პრეზიდენტის მრჩეველი ეროვნული უსაფრთხოების საკითხებში, ჯეიკ სალივანი ხელმძღვანელობდა. შეხვედრის მიზანი იყო სხვადასხვა სამშვიდობო გეგმების, მაგალითად, ჩინეთის, აფრიკისა და ბრაზილიის უკრაინის „მშვიდობის ფორმულასთან“ კონსოლიდაცია. სამიტის შემდეგ ცნობილი გახდა, რომ მონაწილეებმა შეთანხმებას მიაღწიეს მშვიდობიანი გადაწყვეტის ძირითად საკითხებზე, როგორიცაა უკრაინის ტერიტორიული მთლიანობა და სუვერენიტეტი.