ვერ დავინახეთ ჩვენ, რომ მეწყრის რაიმე წინაპირობა შეიძლება ყოფილიყო, - ამის შესახებ საქართველოს თავდაცვის მინისტრმა, ჯუანშერ ბურჭულაძემ შოვში მომხდარ ტრაგედიასთან დაკავშირებით განაცხადა.

როგორც მინისტრი აღნიშნავს, როცა გამოძიება ქვეყნის ტრაგედიას ეხება, ყველა პროცესი მაქსიმალურად ობიექტურად უნდა წარიმართოს.

„მე იქ ვიყავი და ვერ დავინახეთ ჩვენ, რომ მეწყრის რაიმე წინაპირობა შეიძლება ყოფილიყო. რა თქმა უნდა, გამოძიება როდესაც ეხება ქვეყნის ტრაგედიას, ეს დღე იქცა ქვეყნის ტრაგედიად, რომელიც ისტორიას დაამახსოვრდება და, რა თქმა უნდა, ყველა პროცესი მაქსიმალურად ობიექტურად უნდა წარიმართოს. ეს ცალსახაა. რაც შეეხება წინაპირობას, მე ეს შეგრძნება პირადად არ დამრჩენია, რომ ამ მეწყრის რაიმე წინაპირობა არსებობდა“, - განაცხადა ბურჭულაძემ.

შეგახსენებთ, რაჭაში, შოვში მეწყერი 3 აგვისტოს ჩამოწვა. სტიქიის შედეგად დაიღუპა 22 ადამიანი, მათ შორის, ბავშვები. 11 პირის სამძებრო სამუშაოები ამ დრომდე მიმდინარეობს.