პოლონეთის მემარჯვენე პრემიერ-მინისტრის, მეტეუშ მორევეცკის განცხადებით, ქვეყანაში ევროკავშირის მიგრაციის რეფორმების შესახებ რეფერენდუმი ჩატარდება, რომლის დროსაც ამომრჩევლებს ჰკითხავენ, მზად არიან თუ არა ახლო აღმოსავლეთიდან და აფრიკიდან ათასობით არალეგალი მიგრანტი მიიღონ.
კერძოდ, მორავეცკის ინფორმაციით, რეფერენდუმი დასვამს კონკრეტულ შეკითხვას: „მხარს უჭერთ თუ არა ათასობით არალეგალი იმიგრანტის მიღებას ახლო აღმოსავლეთიდან და აფრიკიდან ევროპული ბიუროკრატიის მიერ დაწესებული იძულებითი გადაადგილების მექანიზმის ფარგლებში?"
მორავიეცკის მთავრობა დიდი ხანია ეწინააღმდეგება ევროკავშირის გეგმას მის წევრებს შორის მიგრანტების თანაბრად განაწილების შესახებ. ევროკავშირის შინაგან საქმეთა მინისტრები ივნისში საბოლოოდ შეთანხმდნენ ბლოკის მიგრაციისა და თავშესაფრის პოლიტიკის რეფორმაზე, მიუხედავად იმისა, რომ ზოგიერთი წევრი, განსაკუთრებით, უნგრეთი და პოლონეთი, მისი წინააღმდეგი იყო.
დასავლური მედია წერს, რომ მიგრაცია და უსაფრთხოება არჩევნების ცენტრალური თემა იქნება, რადგან მორავიეცკის მმართველი პარტია კანონი და სამართლიანობა (PiS) ძალაუფლების შენარჩუნებას ცდილობს. მათივე ინფორმაციით, პარტიამ რვაწლიანი მმართველობის გასახანგრძლივებლად საარჩევნო კამპანია გასულ ხუთშაბათს დაიწყო, როდესაც თავდაცვის მინისტრმა, მარიუშ ბლაშჩაკმა გამოაცხადა, რომ პოლონეთი ბელარუსის საზღვართან ახლოს 10 000 ჯარისკაცის გაგზავნას გეგმავს, რათა აგრესორმა ქვეყანაზე თავდასხმა ვერ გაბედოს. განცხადება მას შემდეგ გაკეთდა, რაც, გასულ კვირას, ბელარუსის სამხედრო ვერტმფრენებმა პოლონეთის საჰაერო სივრცე დაარღვიეს და "ვაგნერის" ჯგუფის დაქირავებულებმა ბელარუსში ბანაკი მოაწყვეს.
