ბულგარეთმა მიიღო გადაწყვეტილება, უკრაინის უსაფრთხოების გრძელვადიანი ვალდებულებების უზრუნველყოფის შესახებ "დიდი შვიდეულის" ქვეყნების დეკლარაციას შეუერთდეს.

ბულგარეთის მთავრობაში აცხადებენ, რომ ქვეყანა პოლიტიკურ და პრაქტიკულ მხარდაჭერას უწევს უკრაინას, რომელიც წინააღმდეგობას უწევს რუსეთის აგრესიას და ასევე წვლილი შეაქვს ევროპის ყველა წევრი სახელმწიფოს თავისუფლების, უსაფრთხოებისა და სუვერენიტეტის დაცვაში.

„ამ თანმიმდევრული პოლიტიკის შესაბამისად, ბულგარეთი შეუერთდება "დიდი შვიდეულის" ქვეყნების ერთობლივ დეკლარაციას უკრაინის მხარდასაჭერად", - აცხადებენ ბულგარეთის მთავრობაში.

ვილნიუსში გამართულ ნატო-ს სამიტზე "დიდი შვიდეულის" ქვეყნები შეთანხმდნენ უკრაინის „უსაფრთხოების გარანტიების“ ჩარჩო დოკუმენტზე. ლიდერები შეთანხმდნენ უსაფრთხოების გარანტიების არა კონკრეტულ პარამეტრებზე, არამედ მათ ჩარჩოებზე და კონკრეტულ ორმხრივ ხელშეკრულებებს მოგვიანებით მოეწერება ხელი. ბულგარეთის გარდა, დეკლარაციას უკვე 15 სახელმწიფო შეუერთდა.