გაეროს განვითარების პროგრამის მუდმივი წარმომადგენელი საქართველოში ნიკ ბერესფორდი გარდაიცვალა
გაეროს განვითარების პროგრამის მუდმივი წარმომადგენელი საქართველოში ნიკ ბერესფორდი გარდაიცვალა. ამის შესახებ ინფორმაციას საქართველოში გაეროს განვითარების პროგრამა ავრცელებს, სადაც ნათქვამია, რომ ნიკ ბერესფორდთან დამშვიდობების მსურველთათვის სამძიმრის წიგნი 24 და 25 აგვისტოს, 10:00-დან 18:00 საათამდე, გაეროს სახლში გაიხსნება (რ. ერისთავის ქ. 9, თბილისი).
„ამ წარმოუდგენლად რთულ დროს, ღრმად თანავუგრძნობთ ნიკის ოჯახს, მათ გვერდით ვდგავართ და თანადგომას ვუცხადებთ.
მისმა ურყევმა ერთგულებამ გაეროს ღირებულებების მიმართ, უდიდესი გავლენა მოახდინა გაეროს განვითარების პროგრამის საქმიანობაზე. მას სჯეროდა სიღარიბის დაძლევის და ყველაზე ბედნიერი იყო მაშინ, როდესაც იმ ოჯახებსა და თემებს სტუმრობდა, რომელთა ცხოვრება გაეროს განვითარების პროგრამის წყალობით შეიცვალა.
საქართველოში გატარებული ორი წლის განმავლობაში ნიკ ბერესფორდმა საყოველთაო სიყვარული, ნდობა და პატივისცემა დაიმსახურა. მისმა თავმდაბლობამ და კეთილშობილებამ წარუშლელი კვალი დატოვა საქართველოში გაეროს განვითარების პროგრამის გუნდის წევრთა გულებში.
ნიკ ბერესფორდის უდროოდ წასვლა უდიდესი დანაკლისია როგორც საქართველოსთვის, ასევე გაეროს განვითარების პროგრამის სხვა წარმომადგენლობებისთვის მთელ მსოფლიოში, სადაც ის 20 წლის განმავლობაში მოღვაწეობდა: კამბოჯაში, ბანგლადეშში, სომალში, აღმოსავლეთ ტიმორსა თუ ნიუ იორკში. სიცოცხლეში, ნიკი ბევრისთვის მეგობარი და მისაბაძი მაგალითი იყო; სიკვდილის შემდეგ, მისი ხსოვნა შთაგონების წყარო იქნება თითოეული ჩვენგანისთვის, გვიყვარდეს ერთმანეთი და უფრო მეტი გავაკეთოთ იმისთვის, რომ უკეთესი სამყარო შევქმნათ ყველასთვის“, - ნათქვამია გაეროს განვითარების პროგრამის განცხადებაში.
ცნობისთვის, ნიკ ბერესფორდი გაეროს განვითარების პროგრამის საქართველოს წარმომადგენლობას საქართველოში 2021 წელს ჩაუდგა სათავეში.
v-if="article.gallery" v-html="article.gallery"
