ეს გულისხმობს მხოლოდ საბერძნეთისა და ბალკანეთის ქვეყნების ურთიერთობებს, უბრალოდ, დღევანდელი ვითარებიდან გამომდინარე, მიპატიჟებული იყო მოლდოვაც და უკრაინაც, თან ორივე ეს ქვეყანა გეოგრაფიულადაც ახლოს არის ბალკანეთის რეგიონთან, - ამის შესახებ ჟურნალისტებთან საპროცედურო საკითხთა და წესების კომიტეტის თავმჯდომარე ირაკლი ქადაგიშვილმა ათენის სამიტთან დაკავშირებით განაცხადა.

მან ხელისუფლების მისამართით გამოთქმულ კრიტიკას უპასუხა და აღნიშნა, რომ ქვეყანას "არანაირი საერთაშორისო იზოლაცია არ ემუქრება და ის, რომ ქვეყანა მშვიდობას ინარჩუნებს, არ არის იზოლაცია".

"ოპოზიცია რაღაც ინფორმაციას რომ წააწყდება, ეხება თუ არა ის საქართველოს, ლაპარაკს იწყებს იმაზე, რომ საქართველო იზოლაციაში ექცევა და ეს ლაპარაკი გვესმის წლებია. ათენთან დაკავშირებით რაც გვესმის, მორიგი სპეკულაციაა, რადგან ათენის სამიტი არის აბსოლუტურად სხვა ფორმატი, რომელიც მუდმივად ტარდებოდა და გულისხმობს მხოლოდ და მხოლოდ საბერძნეთისა და ბალკანეთის ქვეყნების ურთიერთობებს, ამასაც თავის ისტორია გააჩნია, უბრალოდ, დღევანდელი ვითარებიდან გამომდინარე, ამ სამიტზე მიპატიჟებული იყო მოლდოვაც და უკრაინაც, თან ორივე ეს ქვეყანა გეოგრაფიულადაც ახლოს არის ბალკანეთის რეგიონთან და გამომდინარე აქედან ჩვენ არ უნდა ვეძებოთ პროპაგანდისტული მიზეზი, რომ ქვეყანაში ნიჰილისტური განწყობები გავაჩინოთ. საქართველოს არანაირი საერთაშორისო იზოლაცია არ ემუქრება. ის, რომ ქვეყანა მშვიდობას ინარჩუნებს, არ არის იზოლაცია. ესაა განვითარების ვექტორი," - განაცხადა ქადაგიშვილმა.

ცნობისთვის, 21 აგვისტოს ათენში დასავლეთ ბალკანეთის სამიტი გაიმართა, რომელსაც ევროკავშირის კანდიდატი და პოტენციური კანდიდატი 8 ქვეყნის ლიდერები ესწრებოდნენ. საბერძნეთის დედაქალაქში იმყოფებოდნენ კანდიდატი ქვეყნების: უკრაინისა და მოლდოვის პრეზიდენტები, ვოლოდიმირ ზელენსკი და მაია სანდუ. ათენში გამართულ ფორუმში არ მონაწილეობდა საქართველო. ათენში არ ყოფნის მიზეზები საქართველოს საგარეო საქმეთა სამინისტროს ევროინტეგრაციის დეპარტამენტის გენერალურმა დირექტორმა, არჩილ ყარაულაშვილმა განმარტა და აღნიშნა, რომ ათენში, სამხრეთ-აღმოსავლეთ ევროპის 11 ქვეყნის ლიდერების მონაწილეობით გამართული სამიტი არ იყო ევროკავშირის მიერ ორგანიზებული ღონისძიება. მისივე თქმით, ღონისძიების მთავარი თემა იყო უკრაინა-რუსეთის ომი და სწორედ ამიტომ იყო მიწვეული მოლდოვა და უკრაინა.