დღეს ჩვენ ჩამოვედით უკრაინაში, რათა ხვალ ჩვენს მეგობრებთან, ჩვენს ძმებთან ერთად აღვნიშნოთ უკრაინის დამოუკიდებლობის დღე. „ერთიანი ნაციონალური მოძრაობა“ ყოველთვის არის იქ, სადაც სჭირდება საქართველოს, ქართველ ხალხს, - ამის შესახებ „ერთიანი ნაციონალური მოძრაობის“ პარლამენტის წევრმა, დავით ხაჯიშვილმა განაცხადა.

„ერთიანი ნაციონალური მოძრაობის“ ინფორმაციით, პარტიის გენერალური მდივანი პეტრე ცისკარიშვილი, პარლამენტის წევრი და პოლიტსაბჭოს თავმჯდომარე ლევან ბეჟაშვილი და პარლამენტის წევრი დავით ხაჯიშვილი უკრაინაში, უკრაინის დამოუკიდებლობის დღესთან დაკავშირებით გასამართ ღონისძიებას დაესწრებიან. ვიზიტის ფარგლებში ასევე დაგეგმილია მაღალი დონის შეხვედრები.

„ნაციონალური მოძრაობა”, როგორც ყოველთვის, სადაც სჭირდება ჩვენს ქვეყანას, საქართველოს, სადაც სჭირდება ჩვენს მეგობრებს იქ იმყოფება. დღეს ჩვენ ჩამოვედით უკრაინაში, რათა ხვალ ჩვენს მეგობრებთან, ჩვენს ძმებთან ერთად აღვნიშნოთ უკრაინის დამოუკიდებლობის დღე. ჩვენ ვიღებთ სხვადასხვა ღონისძიებებში მონაწილეობას. ეს იქნება ოფიციალური შეხვედრები თუ სხვა დაგეგმილი ღონისძიებები, რომელიც არის სამთავრობო თუ სამოქალაქო. რაც შეეხება “ქართული ოცნების” კიდევ ერთ გამოცხადებულ პოზიციას, რომ ისინი წელსაც არ ჩამოვიდნენ ასეთ მნიშვნელოვან ღონისძიებაზე უკრაინაში, კიდევ ერთხელ აფიქსირებს და ცხადყოფს იმას რომ ისინი რეალურად რუსული მთავრობა არიან და არა ქართული, ისინი მხარს უჭერენ რუსეთს და არა უკრაინას. დღეს ყველა ქართველი პოლიტიკოსის და მით უმეტეს, ხელისუფლების ვალია, რომ იყოს მსოფლიო ცივილიზაციის დამოუკიდებლობის და თავისუფლების დედაქალაქში- კიევში და მხარს უჭერდეს ჩვენს უკრაინელ ძმებს და დებს“, - განაცხადა დავით ხაჯიშვილმა.