ერევანმა ბაქოს სამშვიდობო ხელშეკრულებასთან დაკავშირებით ახალი წინადადებები გადასცა. ინფორმაციას „ეხო კავკაზა“ ავრცელებს.

სომხეთის პრემიერ-მინისტრის, ნიკოლ ფაშინიანის განცხადებით, სომხეთის მიერ მთიან ყარაბაღში გაგზავნილი ჰუმანიტარული ტვირთი კვლავ ლაჩინის დერეფანთან არის გაჩერებული, ჰუმანიტარული ვითარება კი დაძაბული რჩება.

„ერთად-ერთი ცვლილება ეს არის, რომ ლაჩინის დერეფნის გავლით, წითელი ჯვრის და რუსი სამშვიდობოების მეშვეობით, იმ მოქალაქეების გადაადგილება დაიწყო, რომლებიც მკურნალობას საჭიროებენ“, - აღნიშნა ფაშინიანმა.

მისივე თქმით, სომხეთი ფლობს ინფორმაციას ლაჩინის დერეფნის ცალმხრივი გახსნის პროექტების შესახებ, რომელიც მთიანი ყარაბაღიდან გასვლაზე ნებართვას, ხოლო შესვლაზე აკრძალვას გულისხმობს.

„აზერბაიჯანი მუდმივად არღვევს 2020 წლის 9 ნოემბრის სამმხრივი ხელშეკრულების პირობებს და ის იმაზე მოწმობს, რომ აზერბაიჯანის მთავარ მიზანს - მთიანი ყარაბაღიდან სომხების განდევნა წარმოადგენს, ეთნიკური წმენდის, შიმშილის, სამხედრო ოპერაციის თუ სხვა მეთოდების გზით“, - განაცხადა სომხეთის პრემიერ-მინისტრმა.

მან ასევე დაამატა, რომ აზერბაიჯანულ მხარეს სამშვიდობო ხელშეკრულებასთან დაკავშირებით ახალი წინადადებები გაუგზავნა, მაგრამ ამ წინადადებების დეტალებზე არ ისაუბრა.