უკრაინის ეროვნული უსაფრთხოებისა და თავდაცვის საბჭოს მდივნის, ოლექსი დანილოვის განცხადებით, როდესაც უკრაინა ყირიმის სამხედრო გათავისუფლებას დაიწყებს, ამას ყველა დაინახავს და გაიგებს.

დანილოვმა კომენტარი გააკეთა უკრაინის მთავარი სადაზვერვო სამმართველოსა და უკრაინის საზღვაო ძალების მიერ გუშინ ჩატარებულ სპეცოპერაციაზე, რომლის დროსაც ყირიმში, მაიაკის დასახლებასთან პერსონალი გადასხეს. დანილოვმა ხაზი გაუსვა, რომ ოპერაციები არ დასრულდება მანამ, სანამ უკრაინის მთელი ტერიტორია არ გათავისუფლდება.

„ეს არის პირველი ოპერაცია, რომელიც გახდა საჯარო. მანამდე ჩვენი შეიარაღებული ძალები, ჩვენი უსაფრთხოების ძალები სხვა ოპერაციებში იყვნენ ჩართული. ჩვენ ყველა ოპერაციის შესახებ ჩვენს საზოგადოებას ვერ მივაწვდით ინფორმაციას. ერთადერთი, რაც შემიძლია ვთქვა, არის ის, რომ ოპერაციები არ დასრულდება მანამ, სანამ ჩვენი ქვეყნის მთელი ტერიტორია, მათ შორის ყირიმის ავტონომიური რესპუბლიკა, ტერორისტებისგან არ გათავისუფლდება “, - განაცხადა დანილოვმა.

კითხვაზე, ნიშნავს თუ არა ეს, რომ ყირიმის სამხედრო გათავისუფლება უკვე დაიწყო, უკრაინის ეროვნული უსაფრთხოებისა და თავდაცვის საბჭოს მდივანმა უპასუხა: "როდესაც დაიწყება ყირიმის სამხედრო გათავისუფლება, ჩვენ ყველა დავინახავთ. ეს იქნება უფრო ძლიერი ოპერაცია, ვიდრე ამჟამად ხდება".

"რუსებს არ აქვთ საშუალება, რომ ხელი შეგვიშალონ ქვეყნის პრეზიდენტის მიერ ჩვენი ქვეყნის გათავისუფლების მიზნით დასახული ამოცანის შესრულებაში ", - განაცხადა დანილოვმა.