ლიეტუვა ბელარუსთან საზღვარზე კიდევ ორი გამშვები პუნქტის დახურვას გეგმავს
ლიეტუვის მთავრობა ბელარუსის საზღვარზე კიდევ ორი გამშვები პუნქტის დახურვას გეგმავს, - ამის შესახებ ინფორმაციას მედია საშუალებები ლიეტუვის შინაგან საქმეთა მინისტრზე, აგნე ბილოტაიტეზე დაყრდნობით ავრცელებს.
"შინაგან საქმეთა სამინისტრო წამოაყენებს წინადადებას კიდევ ორი საგუშაგოს დახურვის შესახებ. ეს არის ლავორიშკესა და რაიგარდის სასაზღვრო პუნქტები“, - განაცხადა მინისტრმა.
მისი თქმით, კიდევ ორი საგუშაგოს დახურვის გადაწყვეტილება საზღვარზე კონტრაბანდის რაოდენობის შემცირებისა და თანამშრომლების სხვა სასაზღვრო გამშვებ პუნქტებზე გაგზავნის მიზნით მიიღეს.
შეგახსენებთ, 18 აგვისტოდან ლიეტუვამ ბელარუსთან საზღვარზე ექვსი სასაზღვრო გამშვები პუნქტიდან ორი დროებით დახურა.
ამასთან, პოლონეთის, ლატვიის, ლიეტუვისა და ესტონეთის შინაგან საქმეთა მინისტრები შეთანხმდნენ, რომ კრიტიკული ინციდენტის“ შემთხვევაში ბელარუსთან საზღვარი მთლიანად დაიკეტება.
