იაპონიის საგარეო საქმეთა სამინისტროში ჩინეთის ელჩი დაიბარეს, ჩინეთში, იაპონიის საელჩოსთან და სკოლებთან გამართულ საპროტესტო აქციებთან დაკავშირებით, რომლის დროსაც პროტესტანტებმა შენობებს ქვები დაუშინეს.

ინფორმაციას France24 ავრცელებს.

გამოცემის ცნობით, ინციდენტის შემდეგ იაპონიის პრემიერ-მინისტრმა, ფუმიო კიშიდამ მოუწოდა ჩინეთის ხელისუფლებას, უზრუნველყოს „მშვიდი და საპასუხისმგებლო ქმედებები“. სიტუაცია ორ ქვეყანას შორის ფუკუშიმას დაზიანებული ატომური ელექტროსადგურიდან გაწმენდილი რადიოაქტიური წყლის გაშვების გამო დაიძაბა.

იაპონია ასევე ჩინეთში მყოფ ქვეყნის მოქალაქეებს სიფრთხილისკენ მოუწოდებს, გაძლიერებულია სკოლების და დიპლომატიური მისიების დაცვა.

შეგახსენებთ, რომ იაპონიამ ფუკუშიმას განადგურებული ატომური ელექტროსადგურიდან წყნარ ოკეანეში გაწმენდილი რადიოაქტიური წყლის გაშვება დაიწყო. იაპონიის მთავრობის ქმედების საპასუხოდ, ჩინეთმა იაპონიიდან ყველა სახის ზღვის პროდუქტების იმპორტზე აკრძალვა დააწესა.