მცხეთა-მთიანეთის სახელმწიფო რწმუნებულის, დავით ნოზაძის განცხადებით, შიო მღვიმის სამონასტრო კომპლექსთან, სადაც კლდის მასა ჩამოიშალა, გაწმენდითი სამუშაოები აქტიურად მიმდინარეობს.

როგორც მან ჟურნალისტებს განუცხადა, სამუშაოების წარმოების დროს ადგილზე ხალხის გადაადგილება სასურველი არ არის, რადგან ტექნიკა საკმაოდ დიდ სამუშაოებს ახორციელებს.

„გუშინ დილიდან იყვნენ სპეციალისტები, რომლებმაც შეისწავლეს, თუ რა ტექნიკით და როგორ უნდა განხორციელებულიყო სამუშაოები. გუშინვე მოხდა შესაბამისი ტექნიკის მობილიზება. სამუშაოები დაიწყო, ყველა შესაბამისი უწყება, როგორც ადგილობრივი, ასევე ცენტრალური ხელისუფლებიდან ჩართული იყო. დღეს, დღის განმავლობაში უნდა დასრულდეს იმ ტერიტორიის გაწმენდა, რომელზეც გუშინ გაიცა რეკომენდაცია, რომ პირველადი სამუშაო განსახორციელებელი იყო, ამას დღეს დავასრულებთ. შემდგომი რეკომენდაცია თუ იქნება ან განმეორებით ნაშალი თუ ჩამოვა, ტექნიკა ადგილზე რჩება და დამატებით გაიწმინდება. ხალხის რაოდენობა, ტურისტი იქნება, მომლოცველი თუ სხვა, რა თქმა უნდა, სასურველი არ არის ტერიტორიაზე გადაადგილდეს, რადგან ტექნიკა საკმაოდ დიდ სამუშაოებს ახორციელებს“, - განაცხადა ნოზაძემ.

გარემოს ეროვნული სააგენტოს ინფორმაციით, პირველადი შეფასებით შიომღვიმის მონასტრის ჩრდილოეთით, ციცაბოდ დახრილ ფერდობზე ადგილი ჰქონდა სხვადასხვა შემადგენლობის მასის (ქვიშა-ქვები, კონგლომერატები) მყისიერ ჩამოშლას.