ევროკომისია მზად არის უკრაინის ინტერესებში რუსეთის ფედერაციის გაყინული აქტივების გამოყენებაზე წინადადებით გამოვიდეს.

აღნიშნული განცხადება ევროკომისიის წარმომადგენელმა კრისტიან ვიგანდმა გააკეთა.

„ამ საკითხზე დღევანდელი მსჯელობის გათვალისწინებით, ჩვენ მზად ვართ გამოვიდეთ იურიდიული წინადადებით. საკითხი განიხილებოდა ევროსაბჭოს ბოლო სხდომაზეც, რომელიც ივნისის ბოლოს ჩატარდა”, - განაცხადა ვიგანდმა.

მისივე თქმით, მუშაობა ესპანეთის მთავრობასთანაც გრძელდება, რომელიც ევროსაბჭოს თავმჯდომარე ქვეყანაა, მას ასევე უკვე გაეგზავნა შესაბამისი დოკუმენტი.

„მიმდინარეობს ინტენსიური მუშაობა დიდი შვიდეულის ქვეყნებთან. კოორდინირება საერთაშორისო დონეზე ჩვენთვის ძალიან მნიშვნელოვანია“, - აღნიშნა ევროკომისიის წარმომადგენელმა.