ვხედავთ, რომ ხელისუფლება დაკავებულია არა კულტურის ხელშეწყობით, არამედ ცენზურის დაკანონების მცდელობით, - ამის შესახებ პოლიტიკური ჯგუფის „ლელო - პარტნიორობა საქართველოსთვის“ წევრმა ანა ნაცვლიშვილმა კულტურის სფეროს ექსპერტებთან შეხვედრის შემდეგ განაცხადა.

დეპუტატის ინფორმაციით, შეხვედრაზე კულტურის სფეროში განსახორციელებელ ცვლილებებსა და საკანონმდებლო ინიციატივებზე ისაუბრეს.

ნაცვლიშვილის შეფასებით, მნიშვნელოვანია კულტურის სფეროს თავისუფლებისა და დემოკრატიული განვითარების უზრუნველყოფა. მისივე თქმით, აღნიშნულ საკითხზე მსჯელობა მომავალშიც გაგრძელდება.

„ჩვენ ვხედავთ, რომ ხელისუფლება დაკავებულია არა დარგების ხელშეწყობით, არამედ ცენზურის დაკანონების მცდელობით. ეს არის ერთ-ერთი ძალიან მნიშვნელოვანი საკითხი, რომელზეც დღეს პარლამენტი, ფაქტობრივად, არ რეაგირებს. ჩვენ გავაგრძელებთ მუშაობას და თანამშრომლობას ყველა დაინტერესებულ პირთან, რომ ხელოვნების და კულტურის სფეროს თემები იყოს ერთ-ერთი მნიშვნელოვანი და წამყვანი. რაც მთავარია, პარლამენტმა გააცნობიეროს პასუხისმგებლობა, რომელიც დღეს თავიდან აქვს აცილებული. ეფექტური საპარლამენტო ზედამხედველობის უზრუნველყოფა არის კრიტიკულად აუცილებელი და მნიშვნელოვანი“, - განაცხადა ანა ნაცვლიშვილმა.