ეროვნული ბანკის პრეზიდენტის მოვალეობის შემსრულებელი, ნათია თურნავა და ვიცე-პრეზიდენტი, არჩილ მესტვირიშვილი საერთაშორისო სავალუტო ფონდის შუა აღმოსავლეთისა და ცენტრალური აზიის დეპარტამენტის უფროსს, ჯიჰად აზურს შეხვდნენ. ინფორმაციას ეროვნული ბანკი ავრცელებს.

მათივე ცნობით, შეხვედრაზე საუბარი რეგიონის ეკონომიკურ მდგომარეობასა და არსებულ გამოწვევებს შეეხო.

„ნათია თურნავამ ჯიჰად აზურს საქართველოს მაკროეკონომიკური ტენდენციები და ეროვნული ბანკის რეფორმები გააცნო. ამასთან, საუბარი საერთაშორისო სავალუტო ფონდის მიერ მხარდაჭერილი საქართველოს ეკონომიკური პროგრამის მიმდინარეობას შეეხო. აღინიშნა, რომ პროგრამა საქართველოში მაკროეკონომიკური სტაბილურობის განმტკიცებას უწყობს ხელს. ყურადღება გამახვილდა ეროვნული ბანკის როლზე საქართველოს საფინანსო სექტორის სტაბილურობის უზრუნველსაყოფად.

ვიზიტის ფარგლებში, ნათია თურნავამ მონაწილეობა მიიღო სომხეთის ეროვნული ვალუტის - დრამის 30 წლის საიუბილეო ღონისძიებაში. მაღალი რანგის სიმპოზიუმი, დილიჟანში, სომხეთის ცენტრალური ბანკისა და "ბრეტონ ვუდსის კომიტეტის" ორგანიზებით გაიმართა. ეროვნული ბანკის პრეზიდენტის მოვალეობის შემსრულებელმა გაცნობითი ხასიათის შეხვედრები სომხეთისა და უზბეკეთის ცენტრალური ბანკების მმართველებთანაც გამართა“,- აღნიშნულია ინფორმაციაში.