ქალის ცემის ფაქტზე დაკავებულ ქობულეთის მერიის თანამშრომელს პროკურატურამ ბრალდება წარუდგინა
ქობულეთის მუნიციპალიტეტის სოფელ ლეღვაში, ძალადობის ფაქტზე დაკავებულ სოფლის რწმუნებულს ბრალდება წარედგინა.
ინფორმაციას საქართველოს გენერალური პროკურატურა ავრცელებს.
„საქართველოს პროკურატურამ ქობულეთის მუნიციპალიტეტში მომხდარი ძალადობის ფაქტზე ერთ პირს ბრალდება წარუდგინა.
შინაგან საქმეთა სამინისტროს მიერ ჩატარებული გამოძიებით დადგინდა, რომ 1-ელ სექტემბერს, ქობულეთის მუნიციპალიტეტის სოფელ ლეღვაში, ნასვამ მდგომარეობაში მყოფმა სოფელ ლეღვას რწმუნებულმა, ურთიერთშელაპარაკების ნიადაგზე, დაზარალებულის მიმართ ძალადობა განახორციელა. მას ბრალდება საქართველოს სისხლის სამართლის კოდექსის 126-ე მუხლის პირველი ნაწილით (ძალადობა) წარედგინა. სისხლის სამართლის საქმეზე გამოძიება გრძელდება“,- ნათქვამია უწყების მიერ გავრცელებულ ინფორმაციაში.
