ზედმეტია კითხვის ნიშანი, აქვს თუ არა პარლამენტს თავისუფლება, არ შეუწყვიტოს პარლამენტის წევრს სადეპუტატო უფლებამოსილება თუ ჩათვლის, რომ მისი გაცდენები საპატიო არ იყო - რა თქმა უნდა, ამის თავისუფლება პარლამენტს არა აქვს , - ამის შესახებ "ინტერპრესნიუსს" კონსტიტუციური სამართლის სპეციალისტმა ვახუშტი მენაბდემ განუცხადა.

მენაბდის განმარტებით, დეპუტატთა 1/5-ს შეუძლია პარლამენტის გადაწყვეტილება, რომლითაც დავით სერგეენკოს უფლებამოსილება არ შეუწყდა, საკონსტიტუციო სასამართლოში გაასაჩივროს.

მისივე თქმით, სასამართლოს მიერ სარჩელის დაკმაყოფილება პარლამენტის წევრის უფლებამოსილების ვადამდე შეწყვეტას გამოიწვევს.

"კონსტიტუციის მიხედვით პარლამენტის წევრის უფლებამოსილების ვადამდე შეწყვეტის საკითხს პარლამენტი წყვეტს. პარლამენტის წევრის უფლებამოსილების ვადამდე შეწყვეტის ერთ-ერთი საფუძველია არასაპატიო მიზეზით მორიგი სესიის სხდომების ნახევარზე მეტის გაცდენა. მართალია საკითხი კენჭისყრაზე დგება, მაგრამ ეს იმას არ ნიშნავს, რომ პარლამენტს საკითხის გადაწყვეტა პოლიტიკური მიზანშეწონილობით შეუძლია. მან ეს გადაწყვეტილება სამართლის ფარგლებში უნდა მიიღოს. ამაზე მიუთითებს კონსტიტუციის ჩანაწერიც, რომლის მიხედვით პარლამენტის ეს გადაწყვეტილება შეიძლება საკონსტიტუციო სასამართლოში გასაჩივრდეს.

კონსტიტუცია პარლამენტს საკითხის გადაწყვეტაში შეუზღუდავ თავისუფლებას რომ აძლევდეს, მაშინ სასამართლოში დავა ვერ წავიდოდა, რადგან არ იარსებებდა სამართლებრივი ნორმა, რომელიც პარლამენტს ბოჭავს.

რაკი კონსტიტუცია ამ გადაწყვეტილების გასაჩივრებას ითვალისწინებს, ეს ნიშნავს, რომ პარლამენტი კონსტიტუციით შებოჭილია", - განმარტავს ვახუშტი მენაბდე.

პარლამენტმა “ქართული ოცნების“ დეპუტატის დავით სერგეენკოსთვის უფლებამოსილების ვადამდე შეწყვეტას მხარი არ დაუჭირა.

შესაბამისი დადგენილების მიღების მომხრე მხოლოდ ორი დეპუტატი იყო, 12-მა ხმა წინააღმდეგ მისცა. შესაბამისად, დადგენილება “ჩავარდა“ და დავით სერგეენკო პარლამენტში რჩება.

დავით სერგეენკოსთვის სადეპუტატო უფლებამოსილების შეწყვეტას პარლამენტის სხდომების ნახევარზე მეტის არასაპატიო მიზეზით გაცდენა იწვევდა, რასაც თავის მხრივ, კონსტიტუცია და რეგლამენტი ითვალისწინებს.