დროებით ოკუპირებულ მარიუპოლში მეორე დღეა აფეთქებების ხმა ისმის. კერძოდ, მარიუპოლში რუსული არმიის­ გამაგრებული პუნქტები დაიბომბა, არიან დაღუპულები.

ინფორმაციას და შესაბამის ვიდეოს თავის Telegram-არხზე მარიუპოლის მერის თანაშემწე პეტრო ანდრიუშენკო ავრცელებს.

„აფეთქებები რუსული ჯარის გამაგრებულ ობიექტებზე. რა აფეთქდა ჯერჯერობით უცნობია, შესაძლებელია მათ მიერივე გაშვებული ჰაერსაწინააღმდეგო ჭურვი ჩამოვარდა, მაგრამ „ტვირთი-200“-ის (დაღუპულთა ცხედრები) გატანას არაერთი რეისი დასჭირდათ. ხანძრებია პორტ-სიტისა და ბეტონის მინი-ქარხნის ტერიტორიაზე. მტერმა როსტოვის მიმართულებიდან ავიაცია აამოქმედა“, - წერს ანდრიუშენკო.

მან ასევე აღნიშნა, რომ ამჟამად რუს სამხედროებს ტერიტორიიდან საბრძოლო კომპლექტი გააქვთ, მაგრამ ძალიან ნელ ტემპში და ტანკების გარეშე.

შეგახსენებთ, რომ ბოლო დროს დონბასის ტერიტორიაზე ბევრი აფეთქება მოხდა, ნადგურდება რუსული არმიის იარაღის საწყობები, სამხედრო ტექნიკა და ცოცხალი ძალა.