ისლამური რევოლუციის გუშაგთა კორპუსს (ირანის შეიარაღებული ძალების ელიტური ნაწილები) ერაყის საზღვართან ტექნიკა და შეიარაღება გადაჰყავს.

აღნიშნული ოპერაცია ვადის ამოწურვასთან არის დაკავშირებული, რომლის განმავლობაში ბაღდათს ერაყის ქურთისტანში განლაგებული ქურთთა დაჯგუფებების განიარაღება უნდა განეხორციელებინა, რადგან თეირანმა აღნიშნული დაჯგუფებები ტერორისტულ დაჯგუფებებად ცნო.

ინფორმაციას ირანული სააგენტო Tasnim-ი ავრცელებს და შესაბამის ფოტო და ვიდეომასალას ურთავს.

საუბარია ტანკების, ჯავშანმანქანების, ზალპური ცეცხლის სისტემებისა და სხვა ჯავშანტექნიკის გადასროლაზე.

„დღეს თეირანში ერაყის საგარეო უწყების ხელმძღვანელი, ფუად ჰუსეინი ჩავიდა. ირანელ კოლეგასთან, ჰუსეინ ამირ-აბდოლაჰიანთან შეხვედრის დროს ერაყის ჩრდილოეთ ნაწილში განლაგებული ქურთთა დაჯგუფებების განიარაღების საკითხები და ამ პროცესის ვადები განიხილეს“, - ნათქვამია გავრცელებულ ინფორმაციაში.