თინა ბოკუჩავა - როგორც ფრაქცია „ნაციონალური მოძრაობის“ თავმჯდომარემ შემიძლია გითხრათ, რომ ფრაქციის არც ერთი წევრი ბიძინა ივანიშვილის ბინძურ თამაშში მონაწილეობას არ მიიღებს - ვისურვებდი, ამგვარი სპეკულაციები შეწყდეს
მე, როგორც ფრაქცია "ნაციონალური მოძრაობის" თავმჯდომარემ შემიძლია გითხრათ, რომ ფრაქციის არც ერთი წევრი ბიძინა ივანიშვილის ბინძურ თამაშში მონაწილეობას არ მიიღებს - ვისურვებდი, ამგვარი სპეკულაციები შეწყდეს , - ამის შესახებ ჟურნალისტებს საპარლამენტო ფრაქცია "ნაციონალური მოძრაობის" თავმჯდომარემ თინა ბოკუჩავამ პრეზიდენტის იმპიჩმენტის საკითხზე საუბრისას განუცხადა.
ბოკუჩავას თქმით, საპარლამენტო ოპოზიციის წარმომადგენლებს შორის შესაძლოა მოლაპარაკების საგანი გახდეს პრეზიდენტის იმპიჩმენტის კენჭისყრაზე გატანის დღეს სხდომათა დარბაზში არშესვლის საკითხი, რათა არანაირ გადაბრალებასა და სპეკულაციებს ადგილი არ ჰქონდეს.
"მე როგორც ფრაქცია "ნაციონალური მოძრაობის" თავმჯდომარემ შემიძლია საზოგადოება დავარწმუნო, რომ ჩვენი ფრაქცია ბიძინა ივანიშვილის ბინძურ თამაშში მონაწილეობას არ მიიღებს. ეს არის ბინძური თამაში, რომელიც ქვეყნის ევროპული პერსპექტივის საბოტაჟირებას ემსახურება, რაც ჯიზეფ ბორელის საქართველოში ვიზიტის დროს ცხადად გამოჩნდა.
მნიშვნელოვანია, ოპოზიციამ კოორდინირებულად იმოქმედოს, რადგან ეს იქნება არა პრეზიდენტ ზურაბიშვილის დასაცავად გადადგმული ნაბიჯი, არამედ ქვეყნის ევროპული მომავლის დასაცავად გაკეთებული მნიშვნელოვანი განაცხადი", - განაცხადა თინა ბოკუჩავამ.
