სამოქალაქო პლატფორმა „შინ მომავლისთვის“ ინიციატივით, ისტორიულ სამშობლოში დაბრუნებული ქართველები ქვეყნის ისტორიას, ქართულ ენასა და სამართლის საფუძვლებს შეისწავლიან. სამოქალაქო პლატფორმა „შინ მომავლისთვის“ ინფორმაციით, უკრაინის მიმართ რუსეთის აგრესიის მოწინააღმდეგე ეთნიკური ქართველები საგანმანათლებლო კურსს, თბილისში, სრულიად უფასოდ გაივლიან. პლატფორმაზე ქართული ენისა და ისტორიის შესწავლის მსურველი უკვე 100-მდე ბენეფიციარია რეგისტრირებული.

„მაღალი დაინტერესებისა და საპილოტე პროექტის წარმატების შემდეგ, ორგანიზაციამ „შინ მომავლისთვის“ ენის შემსწავლელი კურსი გაფართოებულ ფორმატში განაახლა.

სასწავლო წლის პირველ დღეს ბენეფიციარებს იდეის „შინ მომავლისთვის“ ავტორი და ხელმძღვანელი, გია ხუხაშვილი შეხვდა და პროექტის მნიშვნელობაზე ესაუბრა.

„შინ მომავლისთვის“ ახალი სამოქალაქო პლატფორმაა, რომელიც ქართველთა სოლიდარობის გლობალური ქსელის შექმნის, ემიგრაციისა და სამშობლოში დაბრუნებულ თანამემამულეთა რეინტეგრაციის საკითხებზე მუშაობს“, - ნათქვამია ინფორმაციაში.