აზერბაიჯანის პრეზიდენტ ილჰამ ალიევსა და ევროპული საბჭოს პრეზიდენტ შარლ მიშელს შორის სატელეფონო საუბარი გაიმართა, - ინფორმაციას აზერბაიჯანული მედია ავრცელებს.
მათივე ინფორმაციით, ილჰამ ალიევმა ანტიტერორისტული ღონისძიებების შეწყვეტის შესახებ შეთანხმებაზე ისაუბრა და პოზიტიური ნაბიჯი უწოდა სომხეთის შეიარაღებული ძალების ფორმირებების გაყვანას, უკანონო შეიარაღებული დაჯგუფებების მიერ იარაღის დაყრას, მათ განიარაღებას და ევლახში დაგეგმილ შეხვედრას.
აზერბაიჯანის პრეზიდენტის განცხადებით, ევლახში დღეს დაგეგმილ შეხვედრაზე განიხილება ყარაბაღელი სომხების უფლებები და მოვალეობები აზერბაიჯანის რესპუბლიკის კონსტიტუციისა და კანონების საფუძველზე, ასევე მათი კულტურული, რელიგიური, მუნიციპალური და სხვა უფლებები.
შეგახსენებთ, გუშინ ცნობილი გახდა, რომ მთიან ყარაბაღში მცხოვრები სომხების უფლებების დაცვის, უსაფრთხოების, რეინტეგრაციის და აზერბაიჯანის კონსტიტუციის ფარგლებში ცხოვრების და საქმიანობის უზრუნველყოფის საკითხებზე დღეს ევლახში ადგილობრივი სომხური მოსახლეობისა და აზერბაიჯანის ცენტრალური ხელისუფლების წარმომადგენლების შეხვედრა გაიმართება.
