შოვის ტრაგედიაზე პროკურატურამ ფორმალურადაც კი არ აღძრა საქმე, იძიებს შს მინისტრი, რომელიც შეიძლება თავად იყოს მთავარი პასუხისმგებელი პირი,- ამის შესახებ „ერთიანი ნაციონალური მოძრაობის“ ფრაქციის თავმჯდომარემ, თინა ბოკუჩავამ განაცხადა.

მისივე თქმით, „ქართული ოცნების“ პოლიტიკა ყველა კრიზისში, ყველა ტრაგედიის წინაშე არის გადაბრალების პოლიტიკა.

„შოვის ტრაგედიის შემდეგაც, ჩვენ ვხედავდით, რომ დაზარალებული ადამიანების ბრალეულობაზეც კი საუბრობდა ხელისუფლება, ნაცვლად იმისა, რომ საკუთარ ბრალეულობაზე ესაუბრა და ამ მიმართულებით დაეწყო გამოძიება.

გენერალურმა პროკურატურამ ფორმალურადაც არ აღძრა საქმე ანუ იმ შესაძლო დანაშაულს, რომელთანაც შეიძლება გვქონდეს საქმე, იძიებს თავად შს მინისტრი, რომელიც თავად შეიძლება იყოს მთავარი პასუხისმგებელი პირი“, - განაცხადა თინა ბოკუჩავამ, რომლის კომენტარსაც პარტიის პრესსამსახური ავრცელებს.