იმედი გვაქვს, რომ ასეთი კატასტროფები აღარ განმეორდება, თუმცა კლიმატი იცვლება, ბუნება უფრო ძლიერია, ვიდრე ადამიანი და მნიშვნელოვანია, რომ მზად ვიყოთ, - ამის შესახებ პარლამენტის თავმჯდომარე შალვა პაპუაშვილმა შოვის ტრაგედიაზე, შს მინისტრის ინტერპელაციის წესით მოსმენის დასასრულს განაცხადა.

შალვა პაპუაშვილის თქმით, შოვის ტრაგედიამ დაგვანახა, რომ ასეთ დროს განსაკუთრებით მნიშვნელოვანია ერთმანეთის გვერდით დგომა, სოლიდარობა და დახმარება.

„ის, რაც ვნახეთ შოვში, დიდი ტრაგედიაა ადამიანურადაც და ქვეყნისთვისაც და ბუნებისთვისაც ვფიქრობ, რომ დიდი კატასტროფა მოხდა. მინდა მადლობა გადავუხადო ყველა მაშველს, ყველა სამხედროს, ყველა ექიმს, პოლიციელს, ყველა ოპერატორს მძიმე ტექნიკისა - ვხედავდით, რომ უპრეცედენტო სამუშაო იყო იქ გაწეული იმისთვის, რომ დროულად მომხდარიყო გზების აღდგენა, რათა მაშველებს შეფერხების გარეშე ემუშავათ.

იმედი გვაქვს, რომ ასეთი კატასტროფები აღარ განმეორდება, თუმცა კლიმატი იცვლება, ბუნება უფრო ძლიერია, ვიდრე ადამიანი და მნიშვნელოვანია, რომ ჩვენ ვიყოთ მზად ასეთი კატასტროფებისთვის, მზად, რომ რაც შეგვიძლია წინასწარ განვჭვრიტოთ, მაგრამ თუკი ეს კატასტროფა მაინც თავს დაგვატყდება, ერთი რამე შეგვახსენა შოვის ტრაგედიამ - რომ ამ დროს განსაკუთრებით მნიშვნელოვანია ერთმანეთის გვერდით დგომა, სოლიდარობა, დახმარება და ასე უნდა გავიტანოთ ერთმანეთი, როცა დიდი ტრაგედიები ხდება“, - განაცხადა პარლამენტის თავმჯდომარემ.