ჩეხეთი შვედეთთან მის ტერიტორიაზე უკრაინელი მფრინავების Gripen-ის საბრძოლო თვითმფრინავებზე მომზადების შესახებ მოლაპარაკებებს აწარმოებს, - ამის შესახებ ჩეხეთის თავდაცვის მინისტრმა, იანა ჩერნოხოვამ განაცხადა.

პრაღაში გამართულ საჯარო დისკუსიაზე სიტყვით გამოსვლისას იანა ჩერნოხოვამ აღნიშნა, რომ ჩეხეთის თავდაცვის სამინისტრომ მთავრობას უკრაინელი სამხედროების მომზადების ახალი პროექტი წარუდგინა.

მან, ასევე, პირობა დადო, რომ ჩეხეთი უკრაინის სამხედრო დახმარებას გააგრძელებს.

მედიის ცნობით, კიევი უკვე დიდი ხანია, რაც ცდილობს საკუთარი საჰაერო ძალები თანამედროვე მოიერიშე თვითმფრინავებით გააძლიეროს. გასულ კვირას, შვედეთის თავდაცვის მინისტრმა პოლ იონსონმა განაცხადა, რომ უკრაინელმა მფრინავებმა თვითმფრინავები წარმატებით გამოცადეს. სტოკჰოლმი ჯერ კიდევ განიხილავს, გადასცემს თუ არა უკრაინას საბრძოლო გამანადგურებელ Gripen-ს.