გლდანში, სადაც დაპირისპირება მოხდა, პოლიციამ საგამოძიებო მოქმედებები დაასრულა
გლდანში, სადაც თბილისის საკრებულოში “ერთიანი ნაციონალური მოძრაობის“ დეპუტატს ირაკლი ეძგვერაძეს თავს დაესხნენ, საგამოძიებო მოქმედებები დასრულდა.
როგორც ოპოზიციონერი დეპუტატის, ირაკლი ეძგვერაძის მამა, ტარიელ ეძგვერაძე აცხადებს, სამართალდამცავებმა მათ საკუთრებაში არსებული ავტოფარეხი გაჩხრიკეს, სადაც დაპირისპირება მოხდა.
"ეს ჩვენი ავტოფარეხია, საცხოვრებელ ფართად მაქვს გაფორმებული. აქ შიგნით მომხდარა ჩხუბი და შემდეგ გარეთ გამოსულან. მე არ შევსწრებივარ.
სამართალდამცავებმა გატეხილი ტელევიზორი წაიღეს, "კოკა-კოლის" ბოთლი, დახეული მაისური, მეტი არაფერი", - განაცხადა ტარიელ ეძგვერაძემ.
ინფორმაციისთვის, გლდანში, თბილისის საკრებულოში „ერთიანი ნაციონალური მოძრაობის“ დეპუტატს, ირაკლი ეძგვერაძეს თავს დაესხნენ. ეძგვერაძის განცხადებით, მას ფიზიკურად 30-ზე მეტი პირი გაუსწორდა. ეძგვერაძის თქმით, მასზე განხორციელებული თავდასხმის დამკვეთი საკრებულოში გლდანის მაჟორიტარი დეპუტატი, „ქართული ოცნების“ წევრი კოტე ზარნაძეა.
მოგვიანებით, ადგილზე ვითარება დაიძაბა. „ერთიანი ნაციონალური მოძრაობისა“ და სამართალდამცველებს შორის დაპირისპირებისას პოლიციამ 3 პირი - პარტიის წევრები ნიკა მელია, ზვიად კუპრავა და ბაჩო დოლიძე დააკავა. შსს-მ ირაკლი ეძგვერაძეზე თავდასხმის ფაქტზე გამოძიება ჯგუფურად ჩადენილი ძალადობის მუხლით დაიწყო, ხოლო ნიკა მელია, ბაჩო დოლიძე და ზვიად კუპრავა ადმინისტრაციული წესით არიან დაკავებული.
თბილისის საკრებულოში „ქართული ოცნების“ დეპუტატი კოტე ზარნაძე ბრალდებებს უარყოფს და აცხადებს, რომ ეძგვერაძემ „ნება უნდა იბოძოს და მტკიცებულება დადოს“.
