საქართველოს წითელი ჯვრის საზოგადოების ინიციატივითა და ეიპიემ ტერმინალს ფოთის ფინანსური მხარდაჭერით ფოთში მცხოვრებ სოციალურად დაუცველ მრავალშვილიან 100 ოჯახს სასკოლო/საკანცელარიო ნივთების ნაკრები გადაეცათ.

ამის შესახებ ინფორმაციას ფოთის პორტი ავრცელებს.

მათივე ცნობით, ახალი სასწავლო წლის დასაწყისში ყველა ოჯახის და მითუმეტეს მრავალშვილიანი ოჯახების საზრუნავი ბავშვების სასკოლო ნივთებით უზრუნველყოფაა. ამ პრობლემის გათვალისწინებით სასაჩუქრე ნაკრებში თავმოყრილია ყველა ის ძირითადი ნივთი, რომელიც ბავშვებს სწავლის სრულფასოვნად დაწყებაში დაეხმარებათ.

ინფორმაციის თანახმად, ეიპიემ ტერმინალს ფოთი, სხვადასხვა ინიციატივის ფარგლებში, კვლავაც გააგრძელებს საქველმოქმედო საქმიანობას ფოთში მცხოვრები შეჭირვებული მოსახლეობის მხარდასაჭერად.