აშშ-ის წარმომადგენელთა პალატამ უკრაინისთვის 300 მილიონი დოლარის გამოყოფას მხარი დაუჭირა
აშშ-ის წარმომადგენელთა პალატამ უკრაინის მხარდასაჭერად 300 მილიონი აშშ დოლარის გამოყოფას მხარი დაუჭირა, - ინფორმაციას Politico ავრცელებს.
გამოცემის ცნობით, ეს თანხა ამოღებულია აშშ-ის თავდაცვის ბიუჯეტის პროექტიდან და კენჭი ცალკე უყარეს. პალატამ ასევე მიიღო კანონპროექტი 826 მილიარდი აშშ დოლარის თავდაცვის ხარჯების შესახებ.
Politico-ს ინფორმაციით, მიუხედავად იმისა, რომ ორივე კანონპროექტი დამტკიცდა, „დემოკრატები“ შიშობენ, რომ რუსული პროპაგანდა შეეცდება, უკრაინის დახმარების ცალკე კანონპროექტად გამოყოფა უკრაინის დახმარების ვალდებულებაზე უარის თქმად წარმოაჩინოს.
„რუსებს კარგად ეხერხებათ პროპაგანდა. ამის წარმოჩენა ისე მოხდება, თითქოს ამერიკა უარს ამბობს უკრაინის მიმართ თავის ვალდებულებებზე“, - განაცხადა წარმომადგენელთა პალატის შეიარაღებული ძალების კომიტეტის წევრმა, ადამ სმიტმა.
