უკრაინისა და ევროკავშირის ასოცირების საბჭოს მორიგი, მეცხრე შეხვედრა, დეკემბერში გაიმართება, - ამის შესახებ უკრაინის პრემიერ-მინისტრმა დენის შმიგალმა საგარეო და უსაფრთხოების პოლიტიკის საკითხებში ევროკავშირის უმაღლეს წარმომადგენელთან ჯოზეფ ბორელთან შეხვედრის შემდეგ განაცხადა.
„უკრაინა და ევროკავშირი ასოცირების საბჭოს მომავალ შეხვედრას მიმდინარე წლის დეკემბერში გამართავენ. ამის შესახებ შევთანხმდით ევროკავშირის უმაღლეს წარმომადგენელთან ჯოზეფ ბორელთან შეხვედრის დროს", - წერს უკრაინის პრემიერ-მინისტრი Telegram-ზე.
მას არ დაუკონკრეტებია, სად და როდის გაიმართება ასოცირების საბჭოს სხდომა.
შეგახსენებთ, რომ უკრაინა-ევროკავშირის ასოცირების საბჭო ასოცირების ხელშეკრულების შესაბამისად მოქმედებს და შეთანხმების იმპლემენტაციის მონიტორინგს ახორციელებს.
