ევროკავშირის გაფართოებას არ უნდა ჰქონდეს დადგენილი ვადა, მაგრამ მისი ინსტიტუტები უნდა რეფორმირდეს ახალი წევრების მისაღებად, - ამის შესახებ პორტუგალიის სახელმწიფო მდივანმა ევროპულ საკითხებში ტიაგო ანტუნესმა განაცხადა.

„სისულელეა ფიქსირებული ან ძალიან კონკრეტული ვადების დაწესება. გაფართოების პროცესი ეფუძნება კანდიდატების დამსახურებას, მათი პოტენციალის შეფასებას და კოპენჰაგენის კრიტერიუმების შესრულებას“, - განმარტა ანტუნესმა.

მისი თქმით, ევროკავშირის ლიდერების არაფორმალურ შეხვედრაზე, რომელიც გრანადაში ხვალ გაიმართება, მთავარი თემა ევროკავშირის გაფართოების საკითხი იქნება.

„ეს არის აბსოლუტური პრიორიტეტი, რომელმაც, გეოპოლიტიკური მიზეზების გამო, ახალი მნიშვნელობა შეიძინა, როგორც დასავლეთ ბალკანეთის ქვეყნებისთვის, ასევე აღმოსავლური ტრიოსთვის - უკრაინისთვის, მოლდოვასა და საქართველოსთვის“, - განაცხადა პორტუგალიის სახელმწიფო მდივანმა.