პოპულიზმი რომ იყოს ოლიმპიური სახეობა, თქვენ, ბატონო გიორგი, ოლიმპიური ჩემპიონი იქნებოდით უდავოდ, - ასე მიმართა უმრავლესობის წევრმა არჩილ თალაკვაძემ „სტრატეგია აღმაშენებლის“ თავმჯდომარეს გიორგი ვაშაძეს პარლამენტის პლენარულ სხდომაზე.

მისივე თქმით, წლების წინ პრემიერ-მინისტრს სესხების განულების გამო აკრიტიკებდნენ და ახლა, იგივე თურმე კეთილშობილური საქმეა. თალაკვაძის შეფასებით, ეს წმინდა წყლის პოპულიზმია.

„ბატონი გიორგი ვაშაძე გამოვიდა და გააკეთა განცხადება, რომ ბიუჯეტის მთელი ზრდა პენსიონერებს მივცეთო და დანარჩენი მიმართულებები მოვხსნათ დღის წესრიგიდანო. გავუნულოთ სესხებიო, ოღონდ თქვენ ხართ ის ბატონი გიორგი ვაშაძე, ის ბატონი პაატა მანჯგალაძე და ბატონი დანარჩენები, რომლებიც წლების წინ „ქართული ოცნების“ პრემიერ-მინისტრს აკრიტიკებდით, რომ სესხების განულება არის მოქალაქეების მოსყიდვა და არ შეიძლებაო და ახლა როცა თქვენ გჭირდებათ თურმე სესხების განულება არის კეთილშობილი საქმე და ამ არჩევნების წინ არაფერი პრობლემა არ არის. ეს რომ წმინდა წყლის პოპულიზმია ეს განცხადება, მე მგონი ამაში ეჭვი არავის არ ეპარება, რადგან ჩვენი პენსიონერები არიან ამ საზოგადოების ნაწილი და ის ხარჯები, რასაც მთავრობა სწევს მათაც ეკუთვნით. ანუ ამ ჯანდაცვით, სოციალური დაცვის სისტემით, რომელსაც ფულს ვუზრდით სარგებლობენ პენსიონერებიც და იმ გაზრდილი ხელფასებითაც პენსიონერების ოჯახის წევრები სარგებლობენ. მოკლედ რომ გითხრათ, პოპულიზმი რომ იყოს ოლიმპიური სახეობა თქვენ, ბატონო გიორგი ოლიმპიური ჩემპიონი იქნებოდით უდავოდ“, - განაცხადა თალაკვაძემ.