წინა ხელისუფლებისგან განსხვავებით, რომელიც უპასუხისმგებლოდ ეკიდებოდა მშვიდობას, უსაფრთხოებას და დგამდა ემოციურ ნაბიჯებს, ჩვენ პასუხისმგებლობით ვეკიდებით ამას და ვდგამთ პრაგმატულ ნაბიჯებს, რომელიც პარტნიორებთანაა შეთანხმებული,- ამის შესახებ პარლამენტის ვიცე-სპიკერმა არჩილ თალაკვაძემ ოკუპირებულ აფხაზეთში, ოჩამჩირეში რუსეთის საზღვაო სამხედრო ძალების განთავსების საკითხის კომენტირებისას, ჟურნალისტებთან განაცხადა.

როგორც მან აღნიშნა, ოჩამჩირეში ბაზების განთავსება ამძიმებს უსაფრთხოების გარემოს ჩვენს ქვეყანაში.

„ეს ნაბიჯი ამძიმებს უსაფრთხოების გარემოს ჩვენს ქვეყანაში და რეგიონში და წარმოადგენს მორიგ პროვოკაციას საოკუპაციო რეჟიმის და ოკუპაციის პროცესში გადადგმული ნებისმიერი ნაბიჯი ჩვენთვის მიუღებელია და ეს მიმართულია საქართველოს უსაფრთხოების წინააღმდეგ. ამასთან დაკავშირებით საგარეო საქმეთა სამინისტრომ გაახმოვანა პოზიცია, განვაგრძობთ ჩვენს პარტნიორებთან მუშაობას,"- განაცხადა თალაკვაძემ.