GRUNI პირველი ქართული უნივერსიტეტია, რომელთანაც მსოფლიო ეკონომიკური ფორუმი კვლევებს აქვეყნებს. ამის შესახებ ინფორმაციას გრიგოლ რობაქიძის სახელობის უნივერსიტეტი ავრცელებს.

მათივე ცნობით, 2022 წელს დაწყებული თანამშრომლობის საფუძველზე, რომელიც გრიგოლ რობაქიძის სახელობის უნივერსიტეტსა და მსოფლიო ეკონომიკურ ფორუმს შორის დადებულ მემორანდუმს ეფუძნება, ორგანიზაციები შეთანხმდნენ სისტემატიური ერთობლივი კვლევითი და პრაქტიკური ტიპის ღონისძიებების ორგანიზებაზე.

თანამშრომლობის შედეგად, 2023 წლის 30 აპრილს უკვე გამოიცა პირველი ერთობლივი პროდუქტი სახელწოდებით: „Future of Jobs”, რომელიც WEF-ის ე.წ. FLAGSHIP REPORT-ის კატეგორიაში გადის.

გარდა კვლევისა, რომელიც 22 ქვეყნის ერთობლივი ძალისხმევით განხორციელდა, გრუნის რექტორის მოადგილე, პროფესორი ვახტანგ ჭარაია მიწვეულ იქნა ჟენევაში, WEF-ის სათავო ოფისში დასაქმების სამიტზე, რომელშიც რამდენიმე ასეული დელეგატი მონაწილეობდა მთელი მსოფლიოდან.

გრუნისა და WEF-ის თანამშრომლობა გრძელდება, მიმდინარეობს ახალ კვლევებზე მუშაობა, რომელიც უახლოეს მომავალში გამოქვეყნდება. პროექტში აქტიურად არიან ჩართულნი გრუნის პროფესორები.