„ჰეზბოლა“- თუ აშშ ისრაელსა და „ჰამასს“ შორის კონფლიქტში ჩაერევა, ახლო აღმოსავლეთში აშშ-ის პოზიციები ჩვენი სამიზნე გახდება - პალესტინა უკრაინა არ არის
„ჰეზბოლა“ იმუქრება, რომ ახლო აღმოსავლეთში აშშ-ის პოზიციებს დაარტყამს, თუკი ის უშუალოდ ჩაერევა ისრაელსა და „ჰამასს“ შორის კონფლიქტში, - ინფორმაციას The Time of Israel-ი ავრცელებს.
"პალესტინა უკრაინა არ არის. თუ აშშ უშუალოდ ჩაერევა, რეგიონში შეერთებული შტატების ყველა პოზიცია გახდება წინააღმდეგობის ღერძის ლეგიტიმური სამიზნე და ჩვენი თავდასხმების წინაშე აღმოჩნდება“, - ნათქვამია დაჯგუფების განცხადებაში.
შეგახსენებთ, გუშინ ცნობილი გახდა, რომ ამერიკის შეერთებულ შტატებს ხმელთაშუა ზღვის აღმოსავლეთით ხომალდები გადაჰყავს, რომელთა შორის ავიამზიდიცაა. პენტაგონის განცხადებით, აშშ-ის არმია განათავსებს საზღვაო ხომალდებს და საბრძოლო თვითმფრინავებს, რათა ისრაელში მიმდინარე ბრძოლების ფონზე "გაამყაროს რეგიონული შეკავების მცდელობები“ .
