პარლამენტის პლენარული სხდომის წამყვანს, კენჭისყრის ჩასატარებლად, საკითხის განხილვის შეჩერების უფლება ექნება
პარლამენტის პლენარული სხდომის წამყვანს, კენჭისყრის ჩასატარებლად, საკითხის განხილვის შეჩერების უფლება ექნება. ასეთი შესაძლებლობა პარლამენტის თავმჯდომარესა და ვიცე-სპიკერებს რეგლამენტში დაგეგმილი ცვლილებებით ეძლევათ.
აღნიშნულ ინიციატივაზე განმარტება ბიუროს სხდომაზე პარლამენტის თავმჯდომარემ შალვა პაპუაშვილმა გააკეთა.
“გვაქვს შემთხვევები, როდესაც საკითხი განხილულია, კენჭისყრისთვის მზად არის, გადავდივართ შემდეგ საკითხზე, რომელსაც დიდი დრო სჭირდება და კენჭისყრას ვერ ვატარებთ. ასეთი გამოცდილება ახლახანსაც გვქონდა ბიუჯეტში ცვლილებების დამტკიცების დროს, როდესაც სხვა პროექტის განხილვა “გაიწელა“. შემოვა დებულება, რომელიც სხდომის თავმჯდომარეს შესაძლებლობას მისცემს, რომ საკითხის განხილვა შეწყვიტოს, კენჭისყრები ჩაატაროს და შემდეგ საკითხის განხილვა გააგრძელოს. ეს დაგვეხმარება მათ შორის კენჭისყრების დაგეგმისთვის“, - განაცხადა პაპუაშვილმა პარლამენტის ბიუროს სხდომაზე.
პარლამენტის რეგლამენტში ცვლილებების პროექტი, რომელიც “ქართული ოცნების“ დეპუტატებმა მოამზადეს, პარლამენტში ინიცირებულია.
v-if="article.gallery" v-html="article.gallery"
