აშშ აფრთხილებს ყველას, ვინც ცდილობს ისრაელში შექმნილი სიტუაციით „ისარგებლოს“, - ამის შესახებ აშშ-ის პრეზიდენტის მრჩეველი ეროვნული უსაფრთხოების მიმართულებით ჯეიკ სალივანი „ტვიტერზე“ წერს.

ჯეიკ სალივანმა განაცხადა, რომ ვაშინგტონი პარტნიორებთან ერთად მუშაობს და „აფრთხილებს ყველას, ვინ ცდილობს შექმნილი სიტუაციით სარგებელი მიიღოს“.

მან ასევე აღნიშნა, რომ ესაუბრა ისრაელის ეროვნული უსაფრთხოების ოფიციალურ წარმომადგენლებს და მათ კიდევ ერთხელ დაუდასტურა აშშ-ის პრეზიდენტის ჯო ბაიდენის „ურყევი მხარდაჭერა ისრაელის მიმართ“ და მათთან ერთად შემდგომი ნაბიჯები განიხილა.

„ჩვენ ასევე ყველაფერს ვაკეთებთ იმისთვის, რომ დავადგინოთ აშშ-ის დაკარგული მოქალაქეების ადგილსამყოფელი“, - წერს სალივანი „ტვიტერის“ საკუთარ გვერდზე.