ისრაელის ეროვნული უსაფრთხოების მინისტრი, იტამარ ბენ გვირი აცხადებს, რომ მისი სამინისტრო 10 000 ცეცხლსასროლ იარაღს ყიდულობს, რათა სამოქალაქო უსაფრთხოების ჯგუფები შეაიარაღონ.

ამის შესახებ ინფორმაციას The Times of Israel-ი ავრცელებს.

იტამარ ბენ გვირის თქმით, ყურადღება გამახვილდება საზღვრებთან ახლოს მდებარე ქალაქებში, ასევე შერეულ ებრაულ-არაბულ ქალაქებსა და დასავლეთ სანაპიროს დასახლებებში.

მინისტრის განმარტებით, ისრაელელი მწარმოებლისგან 4 000 ცეცხლსასროლი იარაღი უკვე შეძენილია და მისი გაცემა დაუყოვნებლივ დაიწყება.

ასევე შეძენილია ჩაფხუტები და ტყვიაგაუმტარი ჟილეტები, რომელიც სამოქალაქო უსაფრთხოების ჯგუფებს ცეცხლსასროლ იარაღთან ერთად დაურიგდებათ.

სამოქალაქო უსაფრთხოების ჯგუფები ისრაელის პერიფერიებში მდებარე პატარა ქალაქების, თემებისა და დასავლეთ სანაპიროს დასახლებების დაცვას უზრუნველყოფენ.