„წითელი ჯვარი“ - ღაზას საავადმყოფოები მორგებად გადაქცევის რისკის ქვეშ არიან
ღაზას საავადმყოფოები მორგებად გადაქცევის რისკის ქვეშ არიან, რადგან ისრაელის მიერ ანკლავის დაბომბვის ფონზე ისინი ელექტროენერგიის გარეშე რჩებიან, - CNN-ის ინფორმაციით, ამის შესახებ წითელი ჯვრის საერთაშორისო კომიტეტი იუწყება.
„იმის გამო, რომ ღაზას ეთიშება ელექტროენერგია, საავადმყოფოებს ეთიშებათ ელექტროენერგია, ინკუბატორებში მყოფი ახალშობილები და ჟანგბადზე მიერთებული ხანდაზმული პაციენტები რისკის ქვეშ იმყოფებიან”, - განაცხადა წითელი ჯვრის საერთაშორისო კომიტეტის რეგიონალურმა დირექტორმა ახლო და შუა აღმოსავლეთში, ფაბრიციო კარბონიმ.
ღაზაში აცხადებენ, რომ ერთადერთმა ელექტროსადგურმა, საწვავის ამოწურვის გამო, მუშაობა შეწყვიტა.
ანკლავის მოსახლეობას ელექტროენერგიისთვის გენერატორების გამოყენებაც შეუძლია, თუმცა ისრაელის მხრიდან ბლოკადის პირობებში გენერატორების მუშაობისთვის საჭირო საწვავი იწურება.
ფაბრიციო კარბონიმ ასევე განაცხადა, რომ „წითელი ჯვარი“ კონტაქტშია როგორც „ჰამასთან“ ასევე ისრაელის ოფიციალურ პირებთან ღაზაში მყოფი მძევლების გათავისუფლების მიზნით.
