ლოიდ ოსტინი დღეს ისრაელში ჩადის
აშშ-ის თავდაცვის მინისტრი, ლოიდ ოსტინი დღეს ისრაელში ჩავა და ქვეყნის ლიდერებს შეხვდება, - ინფორმაციას პენტაგონი ავრცელებს.
პენტაგონში განმარტავენ, რომ ოსტინის ვიზიტის მიზანია, ხაზი გაუსვას შეერთებული შტატების ურყევ ვალდებულებას, მხარი დაუჭიროს ისრაელს „ჰამასის“ ტერორისტების ბოლოდროინდელი თავდასხმების ფონზე.
მოსალოდნელია, რომ ლოიდ ოსტინი შეხვდება ისრაელის პრემიერ-მინისტრ ბენიამინ ნეთანიაჰუს, თავდაცვის მინისტრ იოავ გალანტს და ისრაელის ომის კაბინეტის წევრებს, რათა განიხილონ ისრაელის ოპერატიული დაგეგმარება და ამოცანები და უსაფრთხოების დახმარების საჭიროებები შაბათს დილით დაწყებული თავდასხმების სერიის საპასუხოდ.
„აშკარაა ადმინისტრაციის და ჩვენი მთავრობის ვალდებულება მხარი დაუჭირონ ისრაელელ ხალხს, რადგან ისინი მოქმედებენ თავიანთი ხალხისთვის უსაფრთხოების აღსადგენად," - განაცხადა პენტაგონის მაღალჩინოსანმა.
