2023 წლის 10-13 ნოემბერს ნიდერლანდების ქართული კულტურის ცენტრის ორგანიზებითა და თიკა სვანიძე ვენკოს ინიციატივით ნიდერლანდების სამეფოში, კუნძულ ტექსელზე, გაიმართება საერთაშორისო დიასპორული პროექტი - „ქართული დღეები კუნძულ ტექსელზე“.

პროექტში მონაწილეობას მიიღებენ როგორც ქართული დიასპორისა და დიასპორული ორგანიზაციების წევრები 10-მდე ქვეყნიდან, ასევე სახელმწიფო და არასამთავრობო ორგანიზაციების წარმომადგენლები.

პროექტი გაგრძელდება სამი დღის განმავლობაში და მის ფარგლებში დაგეგმილია სხვადასხვა შემეცნებითი და კულტურული აქტივობა, მათ შორის:

• ვიზიტი ტექსელის ავიაციისა და ომის მუზეუმში, სადაც წარმოდგენილია ტექსელის ავიაციის ისტორია, ტექსელის მეორე მსოფლიო ომის გამოცდილება და 1945 წელს ტექსელის ქართველთა აჯანყებისადმი მიძღვნილი სპეციალური ექსპოზიციის დათვალიერება;
• პროექტის - „ტექსელის ქართველთა სასაფლაოზე მემორიალის დადგმა“ - ფარგლებში შექმნილი მემორიალური მონუმენტის მონახულება. აღნიშნული პროექტის განხორციელებაში ნიდერლანდების ქართული კულტურის ცენტრთან პარტნიორობით აქტიურად იყო ჩართული თავად ტექსელის მერია. პროექტის ფინანსური მხარდამჭერია თიკა სვანიძე ვენკო;
• თიკა სვანიძე ვენკოს ბესტსელერის, ბიოგრაფიული რომანის - „ქალი სხვა სამყაროდან“ - პრეზენტაცია, რომელიც წარმოადგენს ორ ქვეყანას, საქართველოსა და ნიდერლანდების სამეფოს შორის ურღვევი მეგობრობის დასტურს;

• კორნელი კეკელიძის სახელობის ხელნაწერთა ეროვნულ ცენტრთან პარტნიორობით შექმნილი გამოფენის - „ნიდერლანდების სამეფო - რას მოგვითხრობენ ქართული ხელნაწერები?“ წარდგენა;
• პროექტის ფარგლებში გამოიფინება ქართულ-აფხაზური საერთო წარსულის დამადასტურებელი უნიკალური ხელნაწერი, მოქვის სახარება;
• ღვინის დეგუსტაციის გამოცდილება - „Texel“, TSV Estate Winery-ის სპეციალური გამოშვების ღვინო, რომელიც თვალსაჩინოს ხდის საქართველოში ღვინის კულტურის 8000 წელზე მეტ ხნიან ისტორიას;
• შემეცნებითი და საგანმანათლებლო აქტივობები, მათ შორის კალიგრაფიის მასტერკლასები, რომლებიც წარმოაჩენს ქართული ანბანის უნიკალურობას.
• ქართული ფოლკლორული ანსამბლების კონცერტები ქართული ხალხური ცეკვები და სიმღერები მაყურებელს საშუალებას მისცემს, ეზიაროს იუნესკო-ს მსოფლიო მემკვიდრეობის სიაში შეტანილი არამატერიალური კულტურის ძეგლებს;

• თეატრალური ხელოვნების პოპულარიზაციისათვის პირველი ქართული საერთაშორისო თეატრალური სტუდია ,,დაბრუნების" ოფიციალური პარტნიორი თეატრალური სტუდია ,,არტ-პლაზას" დამაარსებელი და სამხატვრო ხელმძღვანელი ქალბატონი თამარ ხიზანიშვილის მასტერკლასი მსახიობის ოსტატობაში, სადადგმო კულტურაში, რეჟისურის საფუძვლებსა და მეტყველების კულტურაში;
• ქართველ მეწარმეთა პროდუქციის გამოფენა-გაყიდვა, მათ შორის, ქართული ღვინის წარდგენა, ქართული ჩაის წარდგენა - TEANATEA, სამკაულის კოლექცია „GOLDEN FLEECE BY TINATIN”, ქართული სუფრა - Supra By TSV და სხვა;
• კუნძულ ტექსელზე შეკრებილი საზოგადოებისთვის ტურისტული კომპანია TIKATOURS-ის ტურისტული შეთავაზებების წარდგენა და ტურისტული პოტენციალის გაცნობა.
• ლექცია თემაზე “რუსეთის მიერ ოკუპირებული ე.წ. სამხრეთ ოსეთისა და ქართული მხარის კულტურულპოლიტიკური ურთიერთობა უახლესი მონაცემებით"- რომელსაც წაიკითხავს დიასპორების ალიანსი საქარველოსთვის წევრი და სამაჩაბლოს მხარის წარმომადგენელი - მაკა მიდოდაშვილი

პროექტი ხელს შეუწყობს საქართველოს პოპულარიზაციას ნიდერლანდების სამეფოში და გააღრმავებს კავშირებს სხვადასხვა ქვეყანაში მოღვაწე დიასპორულ ორგანიზაციებს შორის. ღონისძიებები ხორციელდება საგარეო საქმეთა სამინისტროს მიერ დაფინანსებული საგრანტო პროგრამის - „დიასპორული ინიციატივების ხელშეწყობა“ - ფარგლებში. პროექტით დაგეგმილი ღონისძიებები არის ორი ქვეყნის, საქართველოსა და ნიდერლანდების სამეფოს შორის არსებული ხანგრძლივი მეგობრობისა და საერთო კულტურულ-ისტორიული წარსულის ნათელი გამოხატულება. პროექტის მიზანი სწორედ ამ კავშირებისა და მემკვიდრეობის კიდევ უფრო გამყარება და გაძლიერებაა.

(R)