არავის შევუგზავნივარ არცერთ ქვეყანაში რაიმე პოლიტიკის გასატარებლად. აქ დავიბადე და მხოლოდ ქართულ პოლიტიკას გავატარებ - ეს იცოდეთ და ნურაფერს დაგვაბრალებთ , - ასე მიმართა პარლამენტის ვიცე-სპიკერმა, ავთანდილ ენუქიძემ პრეზიდენტს პარლამენტში, პლენარულ სხდომაზე, სიტყვით გამოსვლისას, სადაც პრეზიდენტის იმპიჩმენტის წესით თანამდებობიდან გადაყენების საკითხს განიხილავენ.
როგორც ენუქიძემ აღნიშნა, ის არავის დავალებას არ ასრულებს.
„ნურავის შვილებთან პასუხისგებას ნუ მოგვთხოვთ. ჩემ შვილებთან ძალიან კარგად ვაგებ პასუხს, როდესაც იქნება და რასაც გავაკეთებ. ჩემი შვილებისთვის არავის არაფერი უჩუქებია და არც ზოგიერთის შვილებივით ამერიკაში არიან. არსად არავის შევუგზავნივარ, არცერთ ქვეყანაში რაიმე პოლიტიკის გასატარებლად. აქ დავიბადე და მხოლოდ ქართულ პოლიტიკას გავატარებ, არავის დავალებას არ ვასრულებ. ეს იცოდეთ და ნურაფერს დაგვაბრალებთ“, - აღნიშნა ენუქიძემ.
ცნობისთვის, საქართველოს პრეზიდენტმა, პარლამენტში სიტყვით გამოსვლისას, სადაც პრეზიდენტის იმპიჩმენტის წესით თანამდებობიდან გადაყენების საკითხს განიხილავენ მმართველ გუნდს შემდეგი სიტყვებით მიმართა: „თურმე გეწყინათ, როცა გუშინ „პატარა კაცებად“ მოგიხსენიეთ, დაელოდეთ და ნახავთ, რა ტერმინებით შეგამკობენ თქვენივე შვილები, მომავალი თაობა და თქვენივე ამომრჩეველი, მე კი ამ პროცესით ვერაფერს დამაკლებთ“. მისივე თქმით, მმართველი გუნდი დღეს მას კი არ უწყობს იმპიჩმენტს, არამედ თავის თავს, ქვეყანას, მის ევროპულ მომავალს.
