სერგეი შამბა - რუსეთთან ისეთი ურთიერთობა გვაქვს, რომ საბჭოთა საზოგადოების დანგრევის მიუხედავად, გრძნობები მაინც არსებობს - გვინდა ვიყოთ და ვართ რუსული სამყაროს ნაწილი

აფხაზეთი რუსული სამყაროს ნაწილია, - ამის შესახებ ოკუპირებული აფხაზეთის ე.წ. უშიშროების საბჭოს მდივანმა, სერგეი შამბამ განაცხადა.

„ჩვენ რუსეთთან ისეთი ურთიერთობა გვაქვს, რომ მიუხედავად იმისა, რომ ჩვენი საბჭოთა საზოგადოება დაინგრა, გრძნობები მაინც არსებობს. აფხაზური საზოგადოება კი რუსულ სამყაროსთან არის მორგებული და მონაწილეობს რუსული სამყაროს შექმნაში. ჩვენ გვინდა ვიყოთ და ვართ ამ სამყაროს ნაწილი“, - განაცხადა შამბამ.

მისი მტკიცებით, რუსული ენის წყალობით აფხაზეთი მსოფლიო კულტურას გაეცნო.

„უნდა ითქვას, რომ რუსულმა საზოგადოებამ ასევე აითვისა მრავალი ტრადიცია და ზოგიერთი კულტურული მომენტი. ეს გამდიდრება ორმხრივი იყო. დიდმა რუსულმა კულტურამ, რა თქმა უნდა, უფრო დიდი გავლენა მოახდინა რუსეთის იმპერიის, საბჭოთა კავშირის დროს მრავალი ერის ფორმირებაზე. აფხაზეთი ყოველთვის იპყრობდა რუსი შემოქმედებითი ინტელიგენციის - მწერლების, მხატვრების და სხვების - ყურადღებას“, - აღნიშნა შამბამ.