პირადი ინფორმაციის ხელშეუხებლობის საკითხებზე შეზღუდული შესაძლებლობების მქონე პირთა ცნობიერების ამაღლების მიზნით, პერსონალურ მონაცემთა დაცვის სამსახურმა ბრაელის შრიფტით ბროშურები დაამზადა. აღნიშნულთან დაკავშირებით ინფორმაციას პერსონალურ მონაცემთა დაცვის სამსახური ავრცელებს.
მათი ცნობით, აღნიშნული მასალები უსინათლოთა კავშირის თავმჯდომარესა და თბილისის სხვა ფილიალების წარმომადგენლებს პერსონალურ მონაცემთა დაცვის სამსახურის უფროსმა - ლელა ჯანაშვილმა გადასცა. შეხვედრას ასევე ესწრებოდნენ სამსახურის უფროსის პირველი მოადგილე- ოთარ ჩახუნაშვილი და ადმინისტრაციული და ეკონომიკური უზრუნველყოფის დეპარტამენტის უფროსი - მაია გოგოლაძე.
უსინათლოთა კავშირის წევრებთან შეხვედრაზე პერსონალურ მონაცემთა დაცვის სამსახურის უფროსმა შეზღუდული შესაძლებლობების მქონე პირთა უფლებების დაცვის მნიშვნელობაზე ისაუბრა. ლელა ჯანაშვილმა მათ პერსონალურ მონაცემთა დაცვის სამსახურის მანდატი და ფუნქციები გააცნო. სამსახურის უფროსმა გამოთქვა მზადყოფნა რომ ცნობიერების ამაღლების მიზნით, კავშირის წევრებისთვის ტრენინგებიც დაინიშნოს.
აღსანიშნავია, რომ უსინათლოთა კავშირს თბილისსა და რეგიონებში 15 ფილიალი აქვს დაფუძნებული, რომლებშიც 3000-მდე წევრია გაერთიანებული. პერსონალურ მონაცემთა დაცვის სამსახური ეტაპობრივად, ბრაელის შრიფტით დამზადებულ ბროშურებს ყველა ფილიალს გადასცემს.
