ურსულა ფონ დერ ლაიენი პალესტინის პრეზიდენტს - „ჰამასმა“ პალესტინელ ხალხს უღალატა - ისრაელმა მშვიდობიანი მოქალაქეების სიცოცხლე უნდა დაიცვას და პატივი სცეს საერთაშორისო ჰუმანიტარულ სამართალს

"ჰამასმა" პალესტინელ ხალხს უღალატა, - ამის შესახებ ევროკომისიის პრეზიდენტმა, ურსულა ფონ დერ ლაიენმა პალესტინის პრეზიდენტს, მაჰმუდ აბასს სატელეფონო საუბრისას განუცხადა.

ურსულა ფონ დერ ლაიენი „ტვიტერის“ გვერდზე წერს, რომ დღეს პალესტინის პრეზიდენტთან, მაჰმუდ აბასთან სატელეფონო საუბარი გამართა.

„ევროკომისია მხარს დაუჭერს გრძელვადიანი მშვიდობის მიღწევის ყველა მცდელობას, რომელიც ორი სახელმწიფოს არსებობას ეფუძნება“, - წერს ფონ დერ ლაიენი.

„მე ნათლად განვაცხადე, რომ ისრაელმა, „ჰამასის“ ტერორისტების წინააღმდეგ, ლეგიტიმური ბრძოლის მეთოდების გამოყენებისას მშვიდობიანი მოქალაქეების სიცოცხლე უნდა დაიცვას და პატივი სცეს საერთაშორისო ჰუმანიტარულ სამართალს“, - აღნიშნა ევროკომისიის პრეზიდენტმა.