რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია ქალაქ დუშეთის წყლის სისტემის საპროექტო-სამშენებლო სამუშაოებს იწყებს. ინფორმაციას რეგიონული განვითარებისა და ინფრასტრუქტურის სამინისტრო ავრცელებს.

უწყების ცნობით, შესაბამის ხელშეკრულებას ხელი გაერთიანებული წყალმომარაგების კომპანიის დირექტორის მოადგილემ, ნინო ნაროზაშვილმა და ტენდერში გამარჯვებული კომპანიის - შპს „გზას“ დირექტორმა, მალხაზ დუმბაძემ მოაწერეს.

„დუშეთში არსებული წყლის სისტემის ნაწილი ამორტიზებულია და რეაბილიტაციას საჭიროებს. პროექტის ფარგლებში აშენდება წყლის გამწმენდი ნაგებობა, მოეწყობა რეზერვუარები, სატუმბო სადგური, მაგისტრალური მილი, წყალმომარაგების ქსელი. რეაბილიტაცია ჩაუტარდება წყლის სათავე ნაგებობებსა და რეზერვუარებს.

პროექტს, სახელმწიფო ბიუჯეტიდან, 37 მილიონამდე ლარი მოხმარდება. სამუშაოების დასრულების შემდეგ მოსახლეობა 24 საათიანი წყალმომარაგებით ისარგებლებს,“ - აღნიშნულია გავრცელებულ ინფორმაციაში.